من العنوان شكل البوست مملة
بس مش مهم
أنا حاسس بالملل يبقى ايه المشكلة لو حسستكم بالملل شوية
اعتبره نوع من المشاركة الوجدانية أو بالغلاسة
او اعتبره نوع من العقاب بما انى قلتلك ان البوست مملة فى الأول ومع ذلك لسه مكمل قراية
يبقى حضرتك تستاهل
ليه بنحس بالملل
هل عشان مش لاقيين حاجة نعملها !!!
أنا ورايا حاجات ياما أوى ومع ذلك حاسس بالملل
يمكن عشان نفسى اعمل حاجة مختلفة وجديدة ومش عارف او مش لاقى
ممكن
بس أكيد مش ده السبب الوحيد
فى تفسيرى للملل أعتقد انه بالمقام الأول نتيجة التزامات بيضعها الانسان على نفسه أو بتوضع عليه بس فى جميع الأحوال مبيكونش مهتم أو مستمتع ومتشوق انه يقوم بالالتزامات دى
مش بالضرورة يكون رافضها
بس مش متشوق ومتحمس انه يقوم بيها
سبب تانى للملل فى رأيى هو الكسل
الكسل انك تبدأ عمل ما يخليك فى حالة شعورية متبلدة
لا انت قمت بالتزام عليك يشغلك ولا انشغلت عنه بعمل أكثر تشويقا
!!! أو ان الكسل نتيجة للملل
مش مشكلة مين اللى بيجيب التانى الموضوع اشبه بالبيضة والفرخة
بس المهم انهم مرتبطين ببعض وأشبه بمتلازمة
وأعتقد فى رأيى ان الثنائى اللعين ده "الكسل والملل" يمثل الطريق الملكى للفشل
طيب ايه بقه الطريق الملكى للنجاح ؟؟
ممكن اتكلم عليه مرة تانية لانى بصراحة ملان جدا وكسلان جدا
فمتستنوش من واحد كسلان وملان يكلمكم على النجاح
مش انهاردة على أى حال
وكل شم نسيم وأنتم بخير :)
